Милано ги донесе на сцената модните гиганти. Луксуз, драма и софистицираност спакувани во префинети креации ги држеа ококорени очите на модните критичари во текот на изминативе шест дена.
Пред модниот месец да го доживее своето финале во Париз, погледнете ги колекциите кои воодушевија во италијанската модна метропола.
Версаче
Донатела Верчасе изненади со бунтовничко шоу во ванк стил („в“ од Версаче и „анк“ од панк). „Не сакав да бидам буквална. Панкот беше последното движење кое навистина ги комбинираше музиката, стилот и однесувањето, па сакав да го пренесам тоа денес. Колекцијата е елегантна, гламурозна, но не е совршена, затоа што, знаете, жените не можат секогаш да бидат совршени“ – изјавила таа.
Тесни PVC панталони и јакни, крзно, претесни фустани, боцки, нитни... колекцијата зрачеше со бестрашност, агресија и опасност, што значи дека креациите ќе ги привлечат само храбрите експериментаторки.
Роберто Кавали
Инспирирајќи се од уметничките дела на врвни сликари како Караваџо и Рубенс, Кавали создаде серија од цветни и барокни принтови кои ги инкорпорира во новата колекција. Доследен на својот стил, познатиот дизајнер кај панталоните го зачува минималното „ѕвонесто“ проширување во долниот дел на ногавиците, а кај сакоата не ја заборави заостреноста на нарамениците.
Роберто Кавали никогаш не бил вљубеник во минимализмот, а новата колекција е уште еден доказ за неговата приврзаност кон вишокот и претерувањето.
Гучи
Мракот и еротизмот завладеаја на пистата на Гучи којашто минатата сезона доживеа експлозија од бои. Бремената дизајнерка Фрида Џанини презентира сексапилна колекција со тесни здолништа и нагласени нараменици. Употребата на стандардна и егзотична змиска кожа ја нагласија моќта на креациите.
„Жената Гучи заведува со својата опасна женственост. Таа е строга, но секси“ – вака Џанини го опишала доминантниот изглед.
Долче и Габана
Доменико Долче и Стефано Габана ја обожаваат Сицилија и секогаш пронаоѓаат инспирација на овој остров. За најновата колекција, креаторското дуо се инспирира од златните мозаици во катедрала во сицилијанското гратче Монреале.
Црковниот стил ги дефинира палетата на бои (златна, црвена и сина) и модните додатоци кои ги надополнуваа креациите.
Џорџо Армани
Италијанскиот ветеран Џорџо Армани не се откажува од стилот „позајмено од машката облека“, инспириран од 20-тите години. 78-годишниот дизајнер повторно украде машки елементи, но им даде нежност за да има сигурно оружје за привлекување на женското око.
Развеани панталони, често од кадифе, и елегантни сакоа ја сочинува неговата понуда за дневна облека, додека вечерните креации се задржаа на поженствениот изглед. „Независна жена“ – накратко ја опишал Армани својата колекција.
Емилио Пучи
Стилот на 60-тите имаше големо влијание на новата колекција на модната куќа Емилио Пучи. „Секогаш гледам на принтовите од архивите, а оваа колекција беше прослава во чест на девојката Пучи, беше за тоа да си среќен и да изгледаш добро и однатре и однадвор. Модата е лек, таа е за среќа“ – изјавил дизајнерот Питер Дандас.
Силуетите беа кратки – фустаните, здолништата, панталоните и туниките не ги надминаа колената, можеби со идејата да дојдат до израз ултра високите и тесни чизми.
