„Ми рече ‘Те сакам’“: Градоначалникот Дарко Костовски сподели топол момент со колега со Даунов синдром

Дарко Костовски раскажа за топол момент кој го имал со колега со Даунов синдром, кој го потсетил дека љубовта е суштината на животот.

Градоначалникот на Општина Бутел сподели фотографија со Марио направена во ходникот на нивното заедничко работно место и раскажа како една мала случка со него му одржала огромна лекција.

Прочитајте:

Фотографијава ни е од денеска, а случката е од пред неколку дена.

Не сакав да ја споделувам, но посилна е од мене, сака да излезе.

Марио ми е колега. Го вработив во општината затоа што бев убеден дека ќе се пронајде во работата, ќе ужива во тоа што го прави, но и дека ќе внесе многу убава енергија меѓу колегите. Така и беше!

Често, кога се движам низ општинската зграда, го забележувам Марио кај копирот, како вредно копира материјали потребни за неговото одделение. Така и пред некој ден, го забележав Марио во ходникот кај копирот. Застанав, како и секогаш, и си помуабетивме на разни теми, омилена ни е темата спорт. По неколку минути се разделивме, а тој остана кај копирот, работејќи.

Се одалечив десетина метри и слушнав како ме довикува:
„Еј, Дарко!“
Се свртев и му реков: „Повели, Марио.“
Со смирен и срамежлив тон ми рече: „Те сакам.“
Секако, му вратив и јас: „И јас тебе.“

Тоа беше ретко чувство, чувство на љубов како кон најблиските. Ме збуни, ме замолчи и ме натера да се потсетам на суштината, на тоа што ако го немаме, немаме ништо, љубовта.

Фала ти, Марио, за сè!  

Во коментарите, Дарко доби бројни пофалби за вработувањето на Марио во општината. Многумина посочија дека љубовта на лицата со Даунов синдром е најчиста и најискрена, како и дека тие заслужуваат поголеми можности за вклучување во општественото живеење.