Мајка создаде детска книга во која хероина е девојче со кохлеарен имплант, исто како нејзината ќерка со оштетен слух

Кејти Петруциело постојано се обидува да ѝ ја зајакне самодовербата на својата мала ќеркичка со оштетен слух.

Креативната авторка напиша детска книга во која хероина е девојче со кохлеарен имплант (слушно помагало), исто како што носи нејзината ќерка Мила.

Идејата за „Mighty Mila“ се јавила кога Мила ја прашала мајка си ‘зошто ниту еден лик во сликовниците нема кохлеарен имплант’.

Кејти била погодена од нејзините зборови и решила да ги преземе нештата во свои раце. Така се родила инклузивната книга.

„Пред две години, мојата 3-годишна ќерка Мила ме погледна со тага во очите и ме праша ‘Мамо, зошто никој во моите книги нема кохлеарен имплант како мене?’ Срцето ми се скрши и знаев дека треба да направам нешто за отсуството на глуви ликови во детските книги. Зашто ако јас не го направев тоа, тогаш кој ќе го направеше?“

„’Mighty Mila’ е сликовница каде сите деца ќе можат да се заљубат во ова имагинативно, смело мало девојче, кое има оштетен слух“ – изјавила мајката.

Мила слушала одредени звуци кога се родила, но по една година докторите забележале дека започнува постепено да го губи слухот и морала неколку години да носи слушно помагало.

Одеднаш, во период од шест месеци нејзиниот слух драстично се влошил и морале да ѝ стават кохлеарен имплант.

Кохлеарни имплантни системи се единствените медицински уреди способни да заменат сетило. Тие им овозможуваат на луѓето со целосна глувост и тешко оштетен слух да слушаат.

„Постојано ја охрабруваме Мила да си го сака и да биде горда на слушното помагало. Ја сакам нејзината самодоверба и една од моите цели како мајка е да ѝ помогнам да ја развие таа самодоверба и да ги слави различностите кои ја прават уникатна“ – додала Кејти.