Мајка која изгуби рака и нога откако беше прегазена од две метроа се искачи на Килиманџаро со хумана цел
Понекогаш, светот го обиколуваат приказни кои нè инспирираат да бидеме истрајни и ни покажуваат дека не постојат граници.
Таква е приказната на Сара де Легарде, која ги изгуби раката и ногата откако беше прегазена од две метроа, но не дозволи тоа да ѝ го уништи животот. Две години подоцна, користејќи протези за екстремитетите таа се искачи на планината Килиманџаро, докажувајќи дека сè е возможно.
„Имав достап до целата таа нега, но многу луѓе немаат. Ова повеќе не е за мене, екстремитетите никогаш нема да пораснат повторно“ – рекла Сара, чија цел е да се соберат средства за да им се помогне на лица без екстремитети од Африка, каде 90% од лицата кои имаат потреба од вештачки екстремитети немаат достап до нив.
Инспиративната Британка останала без два од четирите екстремитети во септември 2022 година. Таа се враќала дома од работа кога се лизнала и паднала во процепот меѓу шините и работ на платформата во подземната железница.
Нејзината рака била смачкана од метро-возот од кој се симнала, а кој тргнувал во тој момент. Минути подоцна, таа била уште еднаш прегазена од метрото кое доаѓало и кое ѝ ја скршило ногата.
Потребни биле околу 15 минути за некој да го слушне нејзиниот плач и да повика итна помош. Таа била одведена во болница, каде ѝ биле ампутирани и раката и ногата.
„Тоа беше многу обичен ден. Не се сеќавам како се случи сето тоа, но можам да ги склопам коцките. Се лизнав и паднав во просторот меѓу возот и перонот, кој беше широк колку моите рамена. Никој не ме слушна и не ме виде. Кога заминуваше возот, ми ја смачка раката. Тоа беше немерлива болка, но за среќа, нашите тела се неверојатни и адреналинот веднаш стапи на сила, па болката беше издржлива. Сепак, морав да излезам оттаму.“
„Лицата на моите деца ми беа пред очи и можев јасно да им ги слушнам гласовите кои ми велеа: ‘Мамо, што правиш? Требаше да си дома.’ Тогаш ми дојде хистерична сила“ – рекла таа.
„Сè уште секој ден ми недостигаат раката и ногата. Протезите се одлични, но тие не се замена за моите екстремитети“ – вели Сара, која додава дека е среќна што е жива.
@thismorning Sarah De Lagarde bravely takes us back to the night she lost both her arm and leg in a horrific accident on London's underground.
♬ original sound - This Morning
На 16 август оваа година, Сара се искачи на „покривот на Африка“ заедно со двете ќерки.
„Не сакам да им го уништам детството и не сакам да мислат дека мајка им е жртва, товар за нив или за општеството.“
„Последниот пат кога се чувствував вистински среќно, силно и како да имам контрола беше кога бев на врвот на таа планина, па на некој начин го барав тоа чувство“ – рекла таа.
