Магична честитка за Василица: Новогодишна каланда посветена на празникот на Свети Василиј Велики
На денешниот празник на Свети Василиј Велики (Стара Нова година), хорот „Митрополит Козма Пречистански“ од Кичево ни подари новогодишна каланда која е вистински мелем за душата.
Во описот на видеото, стои:
Со длабока почит кон вековната духовна и народна традиција, Хорот „Митрополит Козма Пречистански“ – Кичево ја објави новата новогодишна - василичарска каланда, посветена на празникот на Свети Василиј Велики и благословот на Новата година, за која изработи и прекрасен видео запис.
Оваа каланда ја носи пораката за здравје, бериќет и духовна обнова, како што со генерации се пеела при новогодишните благослови од дом на дом. Текстот на новогодишната каланда обединува делови од старата Дебарско-реканска песна и новиот современ и многу поучен текст.
Новогодишната каланда изразува еден достоинствен хорски аранжман, создавајќи топла празнична и духовна атмосфера за сите оние кои ја негуваат православната традиција.
Оркестрацијата и аранжманот, доверени на Владимир Димовски, го издигнуваат делото на ниво на достоинствен хорски манифест. Звучната слика, обликувана во професионалниот амбиент на студиото на Димитар Андоновски, нуди беспрекорна чистота и акустична длабочина која ја доловува свеченоста на празничниот миг.