„Луѓето си заминуваат. Легендите остануваат“: Дивна Пешиќ му посвети уметничко дело на Владо Јаневски

Дивна Пешиќ на емотивен начин се прости од својот долгогодишен пријател Владо Јаневски.

Македонската сликарка, која покрај успешната уметничка кариера го држи и македонскиот рекорд во стрелаштво, ги преточи болката и почитта во уметничко дело. Сликата е инспирирана од ликот и богатото музичко наследство на македонскиот пејач кој почина пред една недела.

Во Instagram објавата, Пешиќ испрати порака до човекот чии песни засекогаш ќе останат дел од македонската музичка историја. 

Еве го нејзиниот пост:

Посветено на мојот драг пријател, Владо Јаневски.

Постојат луѓе што не можеш да ги сместиш во рамки, затоа што се родени да бидат различни. Таков беше ти. Генијална, нежна, емотивна и бескрајно креативна душа, која не секој умееше да ја разбере. Но токму во таа твоја посебност се криеше магијата што ја претвораше во музика.

На Македонија ѝ остави нешто што не може да се измери со никаква награда, песни што се дел од сите животи, љубови, разделби, спомени и тишини. „Булки“, „Црно Тиквешко“, „Некогаш и негде“, „Полско цвеќе“, „Парче душа“, „Не зори зори“, „Не заборавај да се сетиш на мене“… Тоа не се само песни. Тоа се чувства преточени во стихови, зборови што засекогаш ќе допираат до срцето и душата.

Некои уметници заминуваат, но никогаш не исчезнуваат. Тие продолжуваат да живеат во секоја нота, во секој стих и во секој човек што ќе ја почувствува нивната искреност.

Патувај во вечноста, драг мој пријателе! Ми беше огромна чест што те познавав. Ти благодарам за твојата добрина, за твојата искреност, за музиката што ни ја подари и за трагата што засекогаш ќе остане во македонската култура и светот воопшто!

Луѓето си заминуваат. Легендите остануваат.

Почивај во мир 💔