„Љубовта, верата и емоциите се споија во едно“: Филип ѝ предложи брак на саканата Симона пред Острошки манастир

Најубавите љубовни приказни се создаваат во оние спонтани, искрени моменти кои ни ги режира самиот живот, водени од прстот на судбината.

Пред величествениот Острошки манастир, каде што секој камен шепоти молитви и надеж, Филип Велков одлучи да го направи најважниот чекор во својот живот. Со огромна возбуда, тој клекна на колено пред својата сакана Симона Георгиевска и ѝ предложи брак.

А како започна нивната приказна, како Филип ја надмина тремата пред да клекне на колено и кои мали моменти им потврдија дека се создадени еден за друг, среќниот пар со многу емоции раскажа за Фемина.

Си ветивте дека ќе бидете заедно засекогаш на едно од најдуховните места на Балканот. Дали локацијата има посебно значење за вашата врска или изборот произлезе од чудотворната моќ која ја има Острошки манастир?

Острог отсекогаш бил место кое носи посебен мир и духовна сила. И двајцата чувствувавме огромна почит кон манастирот, па токму затоа моментот таму доби уште подлабоко значење. Не беше само избор на убава локација, туку место каде што љубовта, верата и емоциите се споија во едно. За нас, тоа ќе остане свето и незаборавно сеќавање за почетокот на едно ново поглавје.  

Како течеше големиот ден пред Филип да го постави судбоносното прашање?

Денот беше исполнет со возбуда, емоции и некој необјаснив мир. Патувањето до Острог само по себе беше посебно искуство, а атмосферата таму направи сè да изгледа како сцена од филм. Иако не знаев што точно ме очекува, чувствував дека тој ден ќе биде поинаков и засекогаш ќе го паметам.

Симона, се посомнева ли дека можеби Филип крие нешто? Забележа ли некакво нетрпение или скриена возбуда кај него?

Искрено, имаше моменти кога ми изгледаше малку повозбуден од вообичаено, но никогаш не помислив дека ќе се случи запросување. Се трудеше да остане смирен, но денес кога ќе се навратам на моментите, сфаќам дека во неговите очи имало посебна трема и среќа.

Острог носи посебна духовна тежина и мир. Филип, дали во моментот кога клекна на колено почувствува некоја посебна смиреност или, напротив, срцето ти чукаше посилно од кога било?

Во тој момент се измешаа многу емоции, и мир, и огромна возбуда. Срцето ми чукаше силно, но истовремено чувствував сигурност дека го правам најважниот чекор со личноста што ја сакам. Атмосферата во Острог само ја направи таа емоција уште посилна и поискрена.

Кои беа точните зборови што си ги кажавте? Се сеќавате ли на првата реченица по изговореното „Да“?

Во тие моменти емоциите беа толку силни што најмногу зборуваа погледите и прегратките. По „Да“, првото нешто што си го кажавме беше колку сме среќни и благодарни што се имаме еден со друг. Тоа беше момент што засекогаш ќе ни остане во срцето.

Каде точно се криеше прстенот за време на патувањето до Острог? Имаше ли паника на граница или страв дека Симона случајно ќе го најде во багажот?

Прстенот бил скриен многу внимателно за да не предизвика сомнеж. Секако дека имало мала трема дали ќе биде откриен пред време, особено за време на патувањето, но на крајот сè помина совршено и изненадувањето остана тајна до последниот момент.

Како започна вашата љубовна приказна?

Нашата приказна започна сосема спонтано и природно. Од првиот момент почувствувавме посебна поврзаност и блискост. Со текот на времето сфативме дека најубаво функционираме кога сме заедно – како најдобри пријатели, но и како партнери кои се поддржуваат во секој момент.

Во кој момент сфативте дека личност до вас е онаа Вистинската?

Тоа не беше еден конкретен момент, туку многу мали моменти кои постепено нè уверуваа. Начинот на кој се грижиме еден за друг, поддршката во тешките мигови и мирот што го чувствуваме кога сме заедно – тоа ни покажа дека сме го пронашле својот човек.

Дали веќе тајно имате песна за првиот свадбен танц?

Имаме неколку песни што ни се особено драги и носат емоции поврзани со нашата врска, но сè уште не сме донеле конечна одлука. Сакаме тоа да биде песна што вистински ќе нè опишува и секогаш ќе нè потсетува на овој прекрасен период од животот.