„Ликот на човек по 24 часа дежурство, 7 породувања и 44 прегледи“: Д-р Вангелов со моќна објава за лекарите

Михајло Вангелов со моќна објава на социјалните мрежи потсетува дека луѓето треба да имаат повеќе почит и разбирање кон медицинските лица. 

Докторот од Клиничката болница Битола сподели фотографии од неговиот уморен лик со полузатворени очи по 24-часовно дежурство, во кое имал неколку хируршки интервенции, породил седум жени и направил 44 прегледи.

Во објавата со илјадници лајкови и стотици коментари со поддршка и пофалби за посветеноста на гинекологот, д-р Вангелов покажува како изгледа еден обичен работен ден на медицински работник, кој и покрај своите грижи и проблеми, останува професионалец во својата работа.

Неговата објава во целост:

„Ликот на човек по 24-часовно дежурство.

Ликот по една хистеректомија, една инструментална ревизија, три спонтани породувања, четири царски резови и 44 прегледи.

Но, зад овој уморен лик не стои само замор. Стојат 24 часа непрекината концентрација, одлуки донесени во секунди, огромна одговорност и грижата за човечки животи.

Ова не го пишувам за да се пофалам. Го пишувам за да покажам што значи еден обичен работен ден за медицинскиот работник.

Зад секој лекар, медицинска сестра, акушерка и секој друг здравствен работник стои човек кој се уморува, кој има свои грижи, семејство и проблеми — но сепак, кога ќе влезе во ординацијата или операционата сала, од него се очекува да биде целосно посветен, смирен и прецизен.

Затоа, имајте почит, трпение и разбирање кон медицинските лица.

Бидејќи зад белиот мантил не стои машина.

Стои човек кој секој ден ја носи тежината на туѓото здравје и живот.“