Лара Иванова, Јанг Дади, Александар Тарабунов и Сара Мејс... Слушнете ја химната „Together We Shine“ за ЕМОФ Скопје 2025

Лара Иванова, Јанг Дади, Александар Тарабунов и Сара Мејс ги обединија своите таленти за официјалната химна на Европскиот младински олимписки фестивал – ЕМОФ Скопје 2025.

Со песната „Together We Shine“ симболично започнува финалното одбројување до настанот што ќе ја испише новата страница на спортската историја на нашата татковина. Химната не е само песна, таа претставува енергија, визија и повик до цела Европа.

Музиката и текстот се дело на реномираниот продуцент Роберт Билбилов, додека за моќната визуелна приказна и монтажата на видеото е заслужен режисерот Стефан Стиди.

Слушнете ја „Together We Shine“:

„Together We Shine“ е музичка прослава на заедништвото, младешката сила и олимписките вредности – сè она што го претставува ЕМОФ.

Спотот за химната е снимен на повеќе локации во Скопје и Куманово, градови-домаќини на фестивалот, во продукција што го слави единството и креативноста на македонската млада сцена. Со современа визуелна естетика, динамични кадри и присуство на млади спортисти, видеото го отсликува спортскиот жар и колективната мотивација што ја носи ЕМОФ. Во него се појавува и официјалната маскота Shiny, која симболизира ведрина, младешка инспирација и единство – вредности кои ќе бидат во сржта на секој момент од фестивалот.

Од првиот такт до последниот стих, „Together We Shine“ е создадена да инспирира и возбуди. Со стихови како: „EYOF we play, EYOF we shine, EYOF is here, your dream is mine“, химната повикува на обединување преку спортот, на надминување на себе и на славење на секој успех – личен или колективен.

Оваа химна е повеќе од културен симбол - таа е срцето што чука во ритамот на младинската надеж. Таа е повик до секој спортист и секој млад човек што мечтае. Да се обединиме, да блеснеме, да покажеме дека Македонија е подготвена не само да биде домаќин, туку да го инспирира Стариот континент. Нека оваа песна не биде само дел од фестивалот – нека биде неговата душа.

ЕМОФ Скопје 2025 ќе се одржи од 20 до 26 јули, во Скопје, Куманово и Осиек, и ќе обедини над 4000 млади спортисти од 49 европски делегации плус тимот на бегалците.