Љубовната сторија на кралицата Елизабета II и принцот Филип се протега низ повеќе од седум децении. Стоејќи заедно на чело на британската монархија, тие покажаа огромна посветеност на должностите. Заедно го пропатуваа светот и создадоа големо семејство – четири деца, осум внуци и десет правнуци.
Сторијата полна со љубов, почит и восхит започна во 1939 година. Кога се запознаа, 18-годишниот Филип ја започнуваше кариерата во кралската морнарица, а Елизабета имаше само 13 години. Уште по првата средба, тие започнаа да си разменуваат писма, а неколку нивни блиски веднаш забележаа дека се раѓа љубовна искра во очите на младата принцеза.
За време на Втората светска војна, Филип беше дел од морнарицата, а по завршувањето на конфликтот, во 1946 година, тој ја побара раката на Елизабета од нејзиниот татко кралот Џорџ VI. Кралот даде согласност, но имаше молба свршувачката да биде официјална откако Елизабета ќе наполни 21 година. Така, нивната свршувачка беше објавена на 10 јули 1947.
Во ноември 1947 година, парот ја круниса својата љубов со брак во Вестминистерската опатија. Пред церемонијата, Филип се откажа од титулата принц на Грција и Данска, го примил презимето Маунтабет и стана Британец.
По свадбата, парот извесно време живееше во Малта, каде Филип служеше во морнарицата.
Нивните деца, принцот Чарлс и принцезата Ана, се родија пред Елизабета да го наследи нејзиниот татко на тронот.
По ненадејната смрт на нејзиниот татко во 1952 година, Елизабета стана кралица на 25-годишна возраст. Пред крунисувањето, Филип беше принуден да се откаже од кариерата во воените сили каде достигна ранг на командант.
Во 1953 година, Елизабета и Филип беа на 7-месечна турнеја низ светот и посетија 13 земји.
Во 1960 година, парот го доби третото дете – принцот Ендру. Четири години подоцна, се роди и принцот Едвард.
Филип ѝ беше лојален придружник на Елизабета на бројни настани, но беше и патрон на околу 800 организации.
Кралицата во една прилика рече: „Војводата од Единбург има непроценлив придонес во мојот живот во изминатите педесет години“.
Нивниот брак не остана целосно подалеку од скандали и честопати беше намекнувано дека принцот Филип имал афери, но сето тоа остана на територијата на шпекулациите.
Филип се пензионира во мај 2017 година. На почетокот на годината, неговото здравје започна посериозно да се влошува и беше хоспитализиран и опериран. Денес беше објавена веста за неговата смрт.
