Кралица на стилот: Блејк Лајвли во впечатлива креација со чантичка украсена со цртежи од четирите деца на МЕТ балот

По четири години пауза, Блејк Лајвли со стил се врати на балот МЕТ и го украде целото внимание.

Само часови откако постигна спогодба со Џастин Балдони за судскиот спор, 38-годишната актерка зачекори на црвениот тепих во креација од пролетната колекција за 2006 година од архивата на Версаче.

Фустанот, инспириран од барокната уметност и венецијанскиот рококо стил, се одликуваше со драпиран горен дел украсен со нежни камења. Целиот изглед беше заокружен со драматична „опашка“ долга околу 4 метри, која ѝ овозможи вистинска „кралска“ појава на скалите на музејот.

„Срамежлива сум, едноставно сакам моите деца да бидат со мене“ – изјави таа, откривајќи дека нејзината чанта била специјално изработена за неа и украсена со цртежи од секое од нејзините четири деца: Џејмс (11), Инез (9), Бети (6) и Олин (3).

На настанот не се појави нејзиниот сопруг Рајан Рејнолдс, кој стоеше покрај неа на секој чекор од судењето со Балдони поврзано со филмот „It Ends With Us“.

Темата на годинешната свеченост е „Costume Art“ (Костимска уметност) во чест на истоимената изложба во Музејот која ќе биде отворена за јавноста од 10 мај.