Коки Јанков за покојниот Дуле: „Алкохолот му беше проблем... Не можеше да разбере колку беше сакан“
Дуото Дуле и Коки беше едно од омилените во Македонија, а најголема популарност стекна во 1996 година со песната „Виолина и гитара“.
Додека редеа музички успеси, Душан Љубисављевиќ – Дуле и Никола Јанков негуваа и одлични пријателски односи надвор од сцената.
„Ние бевме ептен како браќа“ – рече Коки во подкастот со Давид Давидовски во кој отворено зборуваше за заедничките денови, за тешката приказна, за разводот и за претстојниот концерт кој ќе се одржи на 14 ноември во Македонската филхармонија.
Меѓу другото, во разговорот, тој се осврна и на причината за смртта на Дуле, како и на проблемите со кои се соочувал неговиот пријател.
„Знаеме дека Дуле почина од цироза на црн дроб“ – му рече Давид во емисијата, а Коки додаде: „Може да се каже“. Потоа, Давид го прашаа Коки: „Беше алкохоличар?“
„Имаше проблем со алкохолот... Немаше некој поголем проблем, но секој си знае од каде потекнува, од која фамилија. Сите ние влечеме некакви трауми, некој поголеми, некој помали. Директно, никогаш не сме зборувале ние за тоа, ама можам само да претпоставувам“ – одговори професорот по виолина.
Коки призна дека имало моменти кога Дуле не можел да излезе од кафеана и дека тој го влечел надвор, но нагласи дека неговиот пријател бил исклучително сакан, иако можеби не бил свесен за тоа колку им значел на луѓето.
„Многу го сакавме, не само ние најблиските, туку цела Македонија го сакаше. Тој најверојатно тоа не можеше да го разбере, колку беше сакан“ – рече тој.
Дуле и Коки се немале видено во последните 2-3 месеци пред неговата смрт.
„Вистина е. Тој викенд беше во болница и си рековме ајде понеделник ќе одиме да го видиме, се договаравме со другар од Штип. И баш сабајлето кога тргнавме, ми се јавија неговите и ми викаат толку е.
Се потресовме сите. Јас не верував во тоа... Шок, јас мислев дека ќе се излечи. Станаа толку комплицирани работите, што тогаш сè се распаѓаше... Ептен бевме ние браќа“ – рече тој.
Нивното пријателство траело уште од детството, а музичката соработка била само еден дел од врската што ја имале. Коки се присети и на една своја изјава во која ја опишал нивната различност, но и начинот на кој успевале да функционираат заедно.
Во едно интервју имал изјавено: „Дуле беше огнот, а јас знаев како да повлечам рачна“. На прашањето дали тоа навистина било така, Коки одговорил:
„Тоа е вистина. Тоа е карактерот, тоа е способноста да привлекува. Понекогаш импулсот знаеше да биде и повисок. Но, ние се знаевме од деца и за тоа да функционира, мораше да има моменти каде што за огнот и водата да функционираат заедно, мораше да се повлече и рачна“ – рече тој.
Целиот подкаст можете да го гледате тука: