Ќеркичката на Новак Ѓоковиќ го украде целото внимание на Вимблдон покажувајќи го победничкиот танц „Пумпај“

Секоја победа на Вимблдон, Новак Ѓоковиќ ја прославува со „пумпање“ со неговата ќеркичка Тара, која верно го бодри од публиката.

По победата над сонародникот Миомир Кецмановиќ и пласманот во осминафиналето на тенискиот турнир, 38-годишниот тенисер објасни што значи неговиот победнички танц и ја охрабри 7-годишната Тара да покаже како се игра.

„На нашиот јазик велиме ‘пумпај’, а ‘pump it up’ на англиски. Имаме песна со моите деца, видете ќерка ми го прави тоа во моментов. Миличка, сакаш ли да покажеш?“ – ѝ рече Новак на слатката Тара, која започна да „пумпа“.

„Тоа е мала традиција која ја имаме во моментов. Се надевам дека ќе можам да продолжам, за да можеме да продолжиме да пумпаме“ – додаде српскиот тенисер.

@sportscenternext #novakdjokovic #tennis #daughter #wimbledon ♬ original sound - SportsCenter NEXT

Претходно, на прес-конференција, Новак го објасни танцот и рече:

„Тоа е помеѓу мене и моите деца. Имаме две песни кои ги слушаме, па пред десетина дена зборувавме дека таа кореографија би можела да биде соодветна за победа на Вимблдон. По секоја победа така ќе славам“.

Инаку „Пумпај“ во Србија стана парола на студентските протести кои траат со месеци, а Новак јавно ја има искажано поддршката за истите.