Кејти Холмс „уловена“ како се бакнува со ново момче, кое ја раскина свршувачката откако фотографиите излегоа во јавност

Кејти Холмс беше фотографирана како се бакнува со нејзиното ново момче Емилио Витоло Џуниор во Њујорк.

41-годишната актерка, која е поранешна сопруга на Том Круз, и 33-годишниот кувар си разменуваа нежности пред ресторанот на неговиот татко, кој редовно го посетуваат славни личности.

Но, откако јавноста дозна за нивната врска, Daily Mail објави дека тој бил свршен и дека ја раскинал свршувачката преку порака на денот на објавувањето на фотографиите.

Пријателка на неговата 24-годишна вереница Рејчел Емос за Daily Mail изјавила: „До овој момент Рејчел немаше поим што се случува. Тој е измамник и ова не е приказна со среќен крај... Тие правеа планови за свадба... сега ѝ останаа само лоши натписи и е принудена да се исели од дома“.

Кејти беше во брак со Том Круз од 2006 до 2012 година и заедно имаат една ќерка.