Зошто ни е сè потешко да се фокусираме? Зошто мислите ни „летаат“ на сите страни, концентрацијата лесно нè напушта и менталната „магла“ станува новото нормално?
Шармантната Ели Пешева во најновата епизода на „Reality Check“ се втурнува во разглобувањето на оваа проблематика. Емисијата поаѓа од ставот дека проблемот не лежи само во дигиталните екрани, туку во ритамот на живеење – постојана брзина, премногу информации и притисок секогаш да бидеме „онлајн“.
Во епизодата насловена „Фокус“, гостуваат актерот Гораст Цветковски и психотерапевтот Никола Дукоски.
Преку симболична партија шах помеѓу Цветковски и Пешева, емисијата визуелно и практично тестира дали човечкиот мозок навистина може квалитетно да извршува повеќе задачи истовремено.
Податоците покажуваат дека мозокот брзо се навикнува на кратки, инстант награди, па долготрајната концентрација почнува да ја доживува како напор. Анкетите и практичните експерименти ја разоткриваат илузијата на мултитаскингот, кој наместо ефикасност, носи замор и плитко внимание.
Посебно внимание се посветува на разликите меѓу генерациите, со истражувања што укажуваат дека вниманието не се менува еднакво кај сите и дека искуството има важна улога.
Визуелните тестови во емисијата јасно покажуваат дека често мислиме дека сме присутни, а всушност пропуштаме детали.
Централната порака е едноставна: фокусот не е изгубен, туку занемарен.
Затоа психотерапевтот Никола Дукоски нуди конкретни вежби и игри како алатки за повторно тренирање на вниманието во секојдневието.