Израел доби дозвола да се натпреварува на Евровизија, четири земји ќе го бојкотираат натпреварот следната година

Ирска, Шпанија, Словенија и Холандија одлучија да го бојкотираат изборот на песна за Евровизија следната година. 

Причината е учеството на Израел, земја којашто доби зелено светло да учествува и покрај повиците на неколку членови во Европската радиодифузна унија да се забрани нејзиното учество поради војната во Газа.

Словенија, Шпанија, Црна Гора, Холандија, Турција, Алжир и Исланд бараа да се одржи тајно гласање дали Израел да учествува или не, но тоа не се одржа.

„Најголемиот дел од членовите се согласија дека нема потреба од понатамошно гласање за учество и дека изборот на песна за Евровизија 2026 година треба да продолжи според планот, со дополнителни безбедносни мерки“ – стои во изјавата на Европската радиодифузна унија.

Министерот за култура на Шпанија, Ернест Уртасун, го поддржа бојкотот. Тој рече: „Не можете да го обелите имиџот на Израел со оглед на геноцидот во Газа. Културата треба да биде на страната на мирот и правдата. Горд сум на RTVE која ги става човековите права пред кој било економски интерес.“

Словенечкиот национален радиодифузер RTVSLO изјави дека учеството „би било во спротивност со нвините вредности за мир, еднаквост и почит.“