Дејана Бачко на Инстаграм сподели низа фотографии од детството со кои ги трогна своите следбеници.
Од новиот мини-албум се гледа дека инспиративната Србинка, којашто е родена без раце, уште од мала сликала, држејќи ја четката со стапалата. А на една од фотографиите е прикажана во градинка, како јаде со нозе на посебна маса, во близина на останатите деца, што е само еден доказ за предизвиците со кои се соочувала.
„Со или без попреченост – секој од нас носи свои битки. Благодарна сум за секој чекор, секое паѓање и секој момент што ме научи да летам“ – напиша во описот „Девојката со крилја“.
Талентот што го градела со години денес секојдневно го преточува во нови уметнички дела, а бројот на луѓе што ја следат и поддржуваат постојано расте. Пред неколку дена, Дејана прослави значајно постигнување со сопругот Марко и нивната ќерка Лара – еден милион следбеници на Инстаграм.
Нејзината популарност дојде како последица на силна мисија.
„Сакав да ја подигнам свеста за лицата со инвалидитет и со својот пример некако да ги срушам сите тие предрасуди кои луѓето ги имаат“ – откри српската уметница, додавајќи дека заедно со сопругот на социјалните мрежи достигнале повеќе од 5 милиони следбеници.
„Со цел пред очите и најбавниот напредува побрзо од најбрзиот без цел“ – сподели таа и потсети дека борбата за прифаќање и достоинство започнува од секој поединец, но и дека силата понекогаш расте од најтешките почетоци.
