„Имаше тела насекаде околу мене“: Британец во шок откако ја преживеа авионската несреќа во која загинаа 241 лице

Само едно лице преживеа во авионската несреќа на Air India која се случи вчера во Индија.

Вишваш Кумар Рамеш, вели дека нема никаква претстава како успеал да ја преживее катастрофата во која животот го загубија 241 лице. Британскиот државјанин бил во шок откако успеал на нозе да го напушти местото на несреќата.

„Не знам како преживеав“ – рекол тој по несреќата.

Вишваш, кој живее во Лондон со сопругата и ќерката, раскажал дека бил исфрлен пред авионот да падне и да експлодира. На докторите им рекол дека секунди по полетувањето, авионот започнал да паѓа и се разделил на половина, исфрлајќи го пред да експлодира.

„Триесет секунди по полетувањето, имаше силна бучава и одеднаш авионот се сруши. Се случи многу брзо. Кога станав, имаше мртви тела насекаде околу мене. Бев преплашен. Станав и трчав. Имаше парчиња од авионот насекаде околу мене. Некој ме зграпчи, ме стави во амбулантно возило и ме донесе во болница“ – рекол Рамеш.

По лекарските прегледи, докторите констатирале дека преживеаниот има повреди по телото, но е надвор од животна опасност.

Интернетот е преполн со пораки полни со сочувство за роднините на жртвите, а името на Рамеш стана симбол на чудесно спасување.