„Имам инсулинска резистенција, пијам таблети три пати дневно“: Јелена Розга отворено за проблемите со здравјето

Јелена Розга никогаш не криела дека со години живее со Хашимото, автоимуно заболување на тироидната жлезда. Сега, покрај оваа дијагноза, хрватската пејачка откри дека се соочува и со инсулинска резистенција, поради која секојдневно прима терапија и мора строго да внимава на исхраната.

Во интервју за српскиот „Ин Магазин“ за време на нејзиниот настап на фестивалот „Мелодија Јадрана“ во Сплит, Розга искрено раскажа како изгледа нејзиното секојдневие и колку е предизвикувачки да се одржи здравствената состојба додека постојано настапува и патува.

„Ме ставија на терапија. Имам инсулинска резистенција и тој шеќер 'ми лудува', односно ми се случува на сцената воопшто да го немам, и слабост, и тогаш морам нешто слатко да се напијам. Морам да јадам многу оброци, нутриционистката ми направи правилни оброци, морам да јадам пет пати дневно. Да, тоа е онака малку, со оглед на мојата работа и патувања, малку е тешко и напорно, но јас навистина се трудам. Таблети пијам три пати дневно“ - изјави популарната пејачка.

И покрај здравствените предизвици, Розга не запира со професионалните обврски. Пред само два дена таа ја објави својата најнова песна „Љуби ме“.