Артистка руши стереотипи и се стреми да го промени начинот на кој општеството гледа на жените.
Лејни Молнар создава илустрации кои ги охрабруваат претставничките на понежниот пол да се сакаат онакви какви што се, да веруваат во своите соништа, да ги следат своите амбиции и да не се обидуваат да се вклопат во стереотипните начини на размислување.
31-годишната Унгарка смета дека се врши преголем притисок врз жените и дека очекувањата од нив се нереални. Таа е категорична дека брчките во 30-тите години се нормални и дека секоја жена сама одлучува како ќе се облекува, дали ќе има деца или дали ќе стапи брак.
„Верувам дека притисокот врз жените доаѓа и од општеството и од семејството, медиумите, мажите. Многу е тешко да се задоволат сите нивни очекувања и да се достигнат сите стандарди кои општеството им ги поставува, како да имаме совршена фигура, да бидеме мајки и истовремено амбициозни, да бидеме силни и истовремено чувствителни, да бидеме младолики додека грациозно го прифаќаме процесот на стареење, да изгледаме идеално без премногу пластични операции. Можам да продолжам понатаму и понатаму. Уморни сме од ова“ – вели Молнар.
