Вчера во Македонија дивееја повеќе од 40 пожари, од кои најтешката ситуација беше во пелагонскиот регион каде беа загрозени повеќе населени села како Ивањавци, Лознени и Новоселани.
Стојанче Ангелов во официјалното соопштение изјави дека огнот бил на само 50 метри над куќите и било навистина застрашувачки.
Пожарот го гаселе локалните пожарникари од Битола, Пинцорите на Дирекцијата за заштита и спасување, како и локалното население и луѓе од доброволното друштво „Архангел“ од Битола.
„Особено сакам да истакнам еден локален жител, храбар тракторист од село Ивањевци, Аце. Голема благодарност до Аце, бидејќи со неговиот огромен трактор направи херојско дело, орајќи директно низ пожарната линија и гасејќи голем дел од пожарната линија која што загрозуваше еден дел од селото Лознани. Битката беше многу тешка, но затоа апелирам повторно до граѓаните да бидат многу внимателни“ - истакна директорот на Дирекцијата за заштита и спасување.
На социјалните мрежи се редат само зборови за пофалба за младиот тракторист, чие име е Александар Чепиговски.
Пожарот е ставен под контрола, а од населението кое најпожртвувано се борело да ги спаси своите куќи, има и едно повредено лице со изгореници на дланките и моментално е во болница.