Машко-женски дуели во готвење со познати личности, многу забавни моменти и смеа, но и кулинарски совети од реномирани готвачи, ќе бидат дел од големото Веро шоу за готвење кое се организира по повод 20-годишнината на Веро. Организацијата на шоуто е големо финале на едномесечната прослава на дводеценискиот јубилеј на Веро, во која компанијата ги награди своите лојални потрошувачи за долгогодишната доверба со специјални попусти, акции и најконкурентни цени.
Шоуто за готвење ќе биде вистински спектакл што ќе се одржува во петок, сабота и недела (од 6 до 8 октомври) во Веро центар, каде ќе биде поставена специјално направена кујна за ова шоу. Во него ќе учествуваат шест познати актери, пејачи и водители од земјава, помогнати од реномирани готвачи од рестораните „Пелистер“, „Томче Софка“ и „Барбакан“. Колку добро се снаоѓаат во кујната ќе покажат актерките Весна Петрушевска и Тања Кочовска, водителите Лила Стојановска и Жаре Бербер и музичарите Петар Младеновски од Суперхикс и Ѓоко Танески.
Во секој од трите денови на шоуто ќе има двајца натпреварувачи кои ќе треба да приготват конкретен зададен рецепт со производи од Веро маркетот. Рецептот на денот секој ден ќе го предлага по еден од трите ресторани, а нивните готвачи ќе бидат дел и од стручното жири кое ќе ги оценува приготвените рецепти и ќе го прогласува победникот на денот.
Секој што сака да биде дел од ова шоу за готвење и сака да го следи во живо може да дојде во Веро центар. На првиот ден од шоуто, во петок (6 октомври) од 17 до 19 часот, ќе се натпреваруваат Весна Петрушевска и Пеце од Суперхикс кои ќе готват рецепт предложен од ресторанот „Барбакан“. Вториот дуел ќе биде меѓу Лила Стојановска и Жаре Бербер во сабота (7 октомври) од 12 до 14 часот со рецепт на ресторанот „Пелистер“. На последниот ден во недела (8 октомври) ќе учествуваат Тања Кочовска и Ѓоко Танески кои од 12 до 14 часот ќе готват рецепт предложен од ресторанот „Томче Софка“. Веро шоуто за готвење ќе може да се следи и преку фејсбук страницата на Веро каде ќе има неколку директни вклучувања.
- Роденденот на Веро сакаме да го прославиме заедно со нашите партнери и добавувачи со кои соработуваме во изминатите години, како и со лојалните потрошувачи без кои денешниот успех немаше да биде комплетен. Затоа решивме роденденската прослава да ја одбележиме со одлични понуди за потрошувачите, но и со големо шоу каде тие ќе поминат квалитетно време во Веро заедно со целото семејство. Горди сме на нашиот тим што успеа сето ова да го реализира – велат од одделот за маркетинг на Веро.
Веро годинава одбележува 20 години од отворањето на првиот маркет во земјава. Оттогаш до денес компанијата се профилираше во еден од најуспешните продажни синџири во трговијата на мало, со мрежа од 12 маркети во три градови во Македонија. Менаџментот на „Веро“ прославата на јубилејот ја посветува на своите лојални потрошувачи кои во голема мера се заслужни за успешното работење на компанијата во изминатите 20 години.