Гледате двојно? Новата колекција на Гучи презентирана на ревија на која дефилираа само близнаци
Алесандро Микеле, креативниот директор на Гучи, смисли интересен и уникатен концепт за презентирање на најновата ревија.
Во Милано, 49-годишниот дизајнер ја откри најновата колекција преку две писти, секоја како одраз на другата. Најинтересно беше што на модното шоу дефилираа само идентични близнаци и близначки.
Најпрво, публиката следеше две посебни ревии кои подоцна, со подигнување на средишниот ѕид, се споија во една. Секој модел се поврза со својот брат или сестра и за рака продолжија да чекорат по пистата.
Алесандро бил инспириран од мајка му и нејзината сестра-близначка. „Магијата кај близнаците е во тоа што се чувствува дека идентичноста е невозможна. Тие не треба да изгледаат исто, но и покрај тоа што изгледаат, тоа е само илузија или ‘напукната симетрија’“ – вели тој.
Иако дефилираа 68 пара близнаци, според Микеле немаше две индивидуи на пистата кои беа навистина идентични.
