Француската метропола е домот на најгламурозните ревии на светот. Синоќа започна Париската недела на високата мода на која ќе бидат претставени мајсторски изработените креации на некои од највлијателните модни куќи.
Модната недела започна со ревијата на Версаче. „Современа божица: Моќ, решителност, сила и гламур“ – со овие зборови Донатела Версаче ги опиша елегантните креации од колекцијата пролет/лето 2014.
На почетокот на ревијата одекнаа зборовите: „I’m blonde, I’m skinny, I’m rich and I’m a little bit of a bitch“ од песната „Donatella“ која Лејди Гага ѝ ја посвети на славната креаторка.
Грејс Џонс била инспирација за сензуалната колекција, што ги објаснува елегантните качулки кои ги збогатуваа силуетите. Повеќето креации се спој на гламур и мистерија, но и провокативност, изразена преку високи шлицови и корсети кои делуваа како геометриски тетоважи на кожата на манекенките.
