Италијанската модна куќа Версаче го означи стартот на Париската недела на високата мода. Дизајнерката Донатела Версаче се наврати на минатото, црпејќи инспирација од црно-белите фотографии на фотографите Мен Реј и Хорст и избирајќи ја Наоми Кембел за ѕвезда на шоуто.
Наоми зачекори на пистата на Версаче по 15-годишна пауза и докажа дека времето како да застанало за неа. 42-годишната модна газела ја отвори и затвори ревијата во црни креации со блескави елементи кои ги разголија нејзините долги нозе.
„Наоми има карактер. Таа е борец. Таа не се срами да ја покаже својата моќ или да ја употреби моќта која ја поседува. И таа не се плаши да преземе ризик. Токму затоа таа е Версаче жена“ – изјавила Донатела.
Блескави креации коишто ја акцентираат женската силуета и отскриваат дел од телото, честопати надополнувани со елементи кои асоцираат на долна облека, го потенцираа гламурот и сексапилот кон кој се стреми Версаче. Крзно, крокодилска кожа, рачно извезени блескави камчиња и мониста, како и „медуза“ елементи ги збогатуваа креациите во длабока сина, зелена, бордо и црна боја.
