Нов архитектонски изум, кој изминатиов викенд беше презентиран во Торонто, може да го претвори кој било слободен простор во функционален стан. Канадското архитектонско студио „Urban Capital“, во соработка со италијанскиот дизајнер Лука Никето, создаде коцка која ги содржи сите елементи потребни за нормален живот.
Компактната коцка наречена „Cubitat“ има висина, ширина и должина од 3 метри, а во неа има вградена кујна, спална, телевизор, бања, перална и плакар. Замислата на компанијата е клиентите да можат брзо да го уредат својот дом, без да треба дополнително да реновираат или да купуваат мебел.
Сепак, главниот проблем за кој дизајнерите треба да најдат решение е како да ја внесат коцката во домовите низ врата со нормална големина.
Оваа „џиновска Рубикова коцка“ набрзо ќе може да се купи онлајн, а потрошувачите претходно ќе можат да изберат како сакаат таа да изгледа. Сè што е потребно за „Cubitat“ да функционира е електрична енергија и вода.