Ева Мендес е ѕвездата од дамска фотосесија на списанието „Flare“. 40-годишната актерка за корицата позираше во болеро и фустан од Шанел.
Во интервјуто за списанието, Мендес зборувала за еволуирањето на нејзиниот стил на облекување. Таа признала дека кога имала 15 години, носела многу посексапилна облека. „Кога имав 15 години, ништо не беше доволно кратко. Морав да ги имам тие кратки панталони и кратки блузи“ – рекла таа.
Сега во нејзиниот плакар доминираат женствени фустани и здолништа, а отсуствуваат тесни фармерки. „Секогаш носам фустани, здолништа – сметам дека се многу лесни. Луѓето велат: Обожавам фармерки, толку се кежуал и лесни. Но, јас сметам дека не се лесни. Тие ми се најголем кошмар“ – изјавила таа.
Кога била запрашана кој ѝ е најомилен фустан што го носела на црвениот тепих, таа без колебање се одлучила за црвениот Гучи фустан во кој блескаше на премиерата на филмот „Last Night“ во 2011 година.
