Зухаир Мурад го освои модниот свет со раскошни фустани кои се олицетворение на префинета елеганција и безвременска женственост. Но, либанскиот дизајнер е на пат да се пробие и на пазарот на луксузни обувки и чанти.
Актуелната колекција за топлата сезона го следи принципот „убавината е во едноставноста“. Обувките следат класични силуети, елегантни чисти дизајни во кои деталите се минимални. Мурад си поигрува единствено со материјалите, меѓу кои се присутни кожа во лакована и мат верзија, сатен, змиска кожа и рафинирана чипка.
Чантичките се со свечен изглед за вечерни прилики. Помеѓу нив може да се забележат чанти со животински принт, футуристички геометриски детали, боцки и кристали во ретро и модерен стил.
