Џузепе Ѕаноти добро знае како да го спои гламурот со елеганцијата и тој микс да го зачини со сексапил и ефектни метални детали. Италијанскиот дизајнер и за претстојната модна сезона креира впечатливи обувки кои имаат моќ да го раздвижат и најмонотониот изглед.
Црпејќи инспирација од минатото и претставувајќи ја на нов и модерен начин, Ѕаноти создаде сандали, чевли, чизми, мокасинки и патики кои сигурно ќе им се протнат под кожата на славните дами.
Вечно модерната црна, страсната црвена и снежната бела се покажаа како одлична основа за колекцијата во која преовладуваат силни златни детали. Креативноста на Ѕаноти сепак не му дозволи да запре на сандали и чевли со елегантни силуети, па тој ја зголеми динамиката со чизми во вестерн стил и патики кои го насочуваат спортскиот стил во погламурозна насока.
