Тарик Едиз остварува невестински соништа со актуелната колекција венчаници кои пленат со заводлива сензуалност и бајковита елеганција.
Турскиот дизајнер во основата на колекцијата „White“ поставува атрактивни силуети кои максимално ја оцртуваат женската фигура, а тврдоглаво не се откажува од класичната силуета „принцеза“.
Романтичната тантела на моменти изгледа како префинета бела тетоважа на кожата на моделите, додека отмените декорации со кристали, бисери и мониста влегуваат во улога на накит и им даваат уникатност на венчаниците. Проѕирните ткаенини му овозможуваат на Тарик да ги зачини креациите со сексапил без да ги пречекори границите на добриот вкус.
Со исклучок на еден фустан, кој шармира со нежна розова нијанса, Едиз без многу експериментирање се насочи кон традиционалната бела боја.
Ова е втора невестинска колекција која излегува од ателјето на Тарик.
