Зухаир Мурад си поигра со неправилни геометриски форми и со деликатноста на тантелата и го истражуваше женскиот сензибилитет при креирањето на колекцијата есен/зима 2015.
Либанскиот дизајнер одушевува со мрачен гламур, кој од една страна заведува со мистичноста, а од друга, со воздржаниот сексапил. Класичната црно-бела комбинација преовладува низ колекцијата, но се истакнуваат и неколку нијанси на сината и виолетовата боја. Силуетите варираат, веројатно со идејата да се задоволат желбите и на најпребирливите дами.
Убавината на зимата, а поточно на снегулките и мразот, зазеде значајно место во модната визија на Мурад, па на луксузните фустани блескаа декорации инспирирани од зимски идиличен пејзаж.
Колекцијата беше презентирана во Париз.
