Сензуален раскош, префинетост и софистицираност магнетски привлекуваат погледи кон свадбените колекции пролет 2015 на Alvina Valenta и Lazaro, брендови кои стојат под капата на компанијата JLM.
Деликатната колекција на Alvina Valenta е наменета за невестите кои освојуваат со рафинирана сензуалност и модерна женственост. Дизајнерката Џесика Вилијамс гравитира околу драматични силуети кои ја дефинираат женската фигура и луксузни ткаенини како француска чипка и свила.
Дизајнерот Лазаро Перез вдахнува романтика и раскош во новата колекција на Lazaro, но истовремено проткајува низ креациите и заводлива женственост. Гламурозните детали од блескави камења и нежните нијанси, со кои Лазаро на моменти ја заобиколува класичната бела боја, им даваат препознатливост на венчаниците.
