Синоќа, Ист Гејт Мол беше преплавен од љубители на модата и италијанскиот дизајн. Повод за тоа беше 26-тото издание на Моден Викенд Скопје.
Во трговскиот центар во Скопје се одржа модна ревија на која беа презентирани креации од познати италијански брендови.
Во публиката уживаа десетици гости кои го проследија шоуто на Liu Jo, Patrizia Pepe, Twinset, Sigma Jewelry, Bark Shoes (Chiara Ferragni), Fashion & Friends, Armani Exchange, Dan John, Dioptra Optics, Errea и Smaragd 1969.
Италијанскиот бренд за накит Rebecca организираше коктел забава пред почетокот на ревиите.
Пред модните шоуа, Божиновски часовници и накит угости 40 личности на отмена вечера, на која го промовираше доаѓањето на италијанскиот бренд за накит Ti Sento на македонскиот пазар.
Ова издание на Моден Викенд Скопје е во тесна соработка со Италијанската Амбасада во Скопје и Италијанската агенција за трговија ITA.
За да го означат почетокот на ревиите, говори одржаа италијанскиот амбасадор во Македонија, Андреа Силвестри, и извршниот директор на Ист Гејт Мол, Игор Давков.
„Годинешната тема на Деновите на италијанскиот дизајн е 'Квалитет кој просветлува. Енергијата на дизајнот и за луѓето и за околината'. Го избравме овој наслов затоа што со својата интелектуална и продуктивна енергија, италијанскиот дизајн има намера да помогне да се донесе светлината во период во кој се чини дека преовладуваат сенките и темнината, и да го направи тоа користејќи го квалитетот кој отсекогаш бил негов белег. Во овој контекст, зборот квалитет не е толку синоним за луксуз, туку фактор на одржлив и одговорен развој“ – истакна Силвестри.
Фотографии: Александар Буневски / Femina.mk