Доменико Долче и Стефано Габана им дадоа на клиентките со длабок џеб уште една дополнителна причина да тргнат на шопинг. Дизајнерското дуо ја претстави колекцијата обувки „Kate“.
Следејќи класична и елеганта силуета, чевлите ќе го заробат погледот на сензуалните дами. „Новата колекција ги спојува женственоста, сензуалноста и иконските црти на брендот со задолжителните бои на сезонава“ – велат прочуените креатори кои со децении се инспирираат од италијанската култура и традиција.
Чевлите се со тенка штикла и модерен шпиц, а доаѓаат во сончево жолта, црвена, небесно сина, млечно зелена, црна и бежова боја. Софистицирана чипка го збогатува изгледот на дел од колекцијата, а кај сите модели бојата на ѓонот е идентична со бојата на самата обувка. Долче и Габана не го прескокнале ниту дивиот леопардски принт.
Пред неколку дена престижната модна куќа ги објави и бајковитите фотографии од рекламната кампања есен/зима 2014. Доменико застанал зад објективот, а главната улога ѝ припаднала на Клаудија Шифер.
