Александар Билодо освои златен медал на Зимските олимписки игри во Сочи, но освои и илјадници срца со огромната љубов кон својот брат Фредерик.
Откако го освои второто олимписко злато во слободно скијање, среќниот Канаѓанец веднаш го побара својот брат, го прегрна и повлече кон себе за заедно да го прослават големиот успех.
Никој не остана рамнодушен на неизмерната среќа на лицето на Фредерик, кој страда од церебрална парализа.
Алекс редовно го посочува својот брат како извор на инспирација и мотивација. „Со мотивираноста што тој ја има, ако имаше шанса, ќе беше четирикратен олимписки шампион. Тој е огромна инспирација, прекрасна личност и ќе продолжи да ме инспирира и по завршувањето на мојата кариера. Јас секогаш се жалам, а тој има многу причини за да се жали и никогаш не го прави тоа“ – рекол успешниот скијач.
Докторите прогнозирале дека Фредерик нема да може да оди по десеттата година од животот, но тој сè уште може да се движи сам. „Секој чекор е тежок за него во животот, а јас сум на полесна патека, па морам да дадам сè од себе, од почит кон него“ – изјавил Билодо.