Старец со сопствени раце направил воз за животни за да може во него да ги вози кучињата кои ги спасува. Двапати неделно, 80-годишниот маж ги води своите миленици на прошетка.
Јуџин Бостик живее во слепа уличка во Тексас, каде со брат му имаат штала за коњи. На нивниот имот одвреме-навреме се појавувале кучиња кои луѓето ги напуштале и ги оставале да гладуваат. „Започнавме да ги храниме, да ги пуштаме внатре и ги однесовме на ветеринар за да ги кастрираме. Создадовме место каде што ќе можат да живеат“ – рекол Бостик за The Dodo.
Иако кучињата имале огромен простор за да трчаат на имотот на двајцата браќа, Јуџин сакал да може да ги води со себе на прошетки за да ги направи уште посреќни. „Започнав со мојот трактор, ќе ставев 4-5 кучиња во него и ќе ги одведев на прошетка. Одеднаш кај нас пристигнаа уште кучиња па си реков: Ох, овде нема доволно место – тогаш се сетив на тоа“ – објаснил тој.
Бостик двапати во неделата ги носи своите животни на прошетки низ градот или во блиската шума, давајќи им љубов и среќа каква што никогаш претходно немале. „Само што ќе чујат дека го прикачувам возот за тракторот, веднаш се возбудуваат. Со трчање доаѓаат и сами влегуваат во него, подготвени за да тргнат“ – додал Јуџин.
Иако има 80 години, тој не планира да престане со својата хумана дејност. „Ќе го правам ова сè додека можам. Кучињата си поминуваат одлично. Едноставно, тие уживаат во тоа“ – рекол тој.
Старецот со секоја прошетка привлекува огромно внимание кај сограѓаните. Откако некои од нив објавија фотографии од добриот старец на социјалните мрежи, името на Јуџин се прочу низ светот.