Есента официјално започна, најавувајќи го доаѓањето на постудената сезона.
Да, можеби деновите ќе стануваат посвежи, а ноќите студени, но и покрај тоа, многумина од нас го обожаваат ова годишно време. Збогум на горештините...
Време е да го реорганизирате плакарот, да ги ставите на преден план комфорните џемпери и модни комбинации, да го посетите пазарот и да ги одберете највкусните тикви, да се фокусирате на пешачење низ волшебната природа и насладувањето во топлите пијалаци.
- Чекорење по шушкавите лисја. Дали некогаш ви се случило да згазнете во купче суви лисја само за да го слушнете шумот? Ова е звук кој сите инстантно нè враќа во детството, кога се забавувавме скокајќи во куповите со штотуку собрани лисја. Ако имате мали деца или миленик, одведете ги на прошетка во природа и евоцирајте спомени.
- Аромата на печена тиква. Ммм...
- Зимницата. Мирисот на печени пиперки, ајварче и мармалади е карактеристичен за есенската сезона и не постои Македонец кој не пораснал со него. Можеби веќе сте испразниле неколку од теглите планирани за зимница.
- Топло кафе или чај на врнежлив и студен ден. Бесценето!
- Изобилство од јаболка. Есента нè благословува со можноста да избираме вкусни сезонски јаболка, кои ќе ни го зајакнат имунитетот. „Едно јаболко на ден и лекар не ви е потребен“. А питата од јаболка... Убавини!
- Пејзажите. Погледот кон природата во есен е неверојатен. Пожолтените дрвја, паднатите лисја, облаците, притаените сончеви зраци...
- Есенската мода. Носењето топли и шик марами и капчиња, плетени џемпери и комфорна широка облека е како мелем за душата на модните зависнички. Здраво чизми! Цело лето чекаме можност повторно да ги облечеме нашите омилени чизми, а сега конечно можеме.
- Мирисот на есенски дожд. Дождот мириса на посебен начин во текот на третото годишно време – многу подобро од оној во останатите периоди од годината. А и чувството е посебно кога ги слушате капките како паѓаат на олуците додека вие седите на сигурно во вашиот дом.
- Читањето книга под топлото ќебенце.
- Прегратката на саканиот. Нема ништо поубаво од потонувањето во топлата прегратка на партнерот по студениот и ветровит есенски ден.
