Емотивен гест: Семејството на Аган Асани го посети момчето кое му посвети гол на починатото другарче, му ја подари неговата топка
Другарството не познава граници, не знае за вера, нација, ниту за поделби. Тоа зборува само на еден јазик - јазикот на срцето.
Откако јавноста беше потресена од трагичната и прерана смрт на 13-годишниот Аган Асани од Черкезе, младиот Давид Докмановиќ му оддаде почит на своето другарче посветувајќи му гол на фудбалски натпревар.
Прекрасниот гест не остана незабележан и допре до срцата на најблиските на починатото момче. И покрај огромната и незамислива болка за загубата на своето чедо, семејството Асани покажа неверојатна големина и благородност. Тие лично го посетија младиот Давид во неговиот дом за да му кажат едно големо „благодарам“.
Како симбол на благодарност, тие му ја подарија фудбалската топка со која Аган обожавал да игра дома. Емоциите, солзите и силните прегратки меѓу двете семејства за време на оваа средба се овековечени со видео објавено од Open TV. Добриот гест на Давид покажа дека човечноста се учи од мали нозе, во кругот на семејството.
Пред неколку дена, додека славеше по постигнатиот гол, Давид го соблече дресот и ја покажа маицата под него на која стоеше името на Аган Асани, како и зборовите „Почивај во мир“.
Аган беше млад и просперитетен фудбалер од Черкези, Куманово, кој почина откако беше удрен со автомобил додека возеше електричен тротинет на регионалниот пат Куманово-Скопје.