Млади докторки од Бугарија бесплатно оперирале неродено бебе, спасувајќи го неговиот живот. Операцијата била направена за првпат во Бугарија во ноември, а бебето се родило во добра здравствена состојба на 17 декември. Родителите на среќното девојче 10 години се обидувале да добијат дете.
Д-р Кристина Чачева и д-р Марина Михова, кои специјализирале во Германија, но работат во Бугарија, одлучиле да го оперираат бебето откако при рутински преглед било установено дека во неговите бели дробови се собира вода и дека нема шанси да преживее. „Решивме дека единствениот начин да му помогнеме е да ја извадиме течноста од плеврите“ – рекла Чачева.
Доктор Кристина Чачева
Доктор Марина Михова
По 12-часовна интервенција, при која бебето тешко 800-900 грама било под дејство на анестезија, состојбата на плодот значително се подобрила.
Докторките, кои ја извеле операцијата без да бараат ништо од семејството Михајлови, никогаш претходно немале учествувано во ваков зафат. Сега се пионери во неговото изведување во Бугарија. „Такви операции имаме гледано на семинари во странство и јас отсекогаш сум си мислела дека можам да бидам гледач во таков еден филм, но не и директен учесник“ – рекла д-р Михова по операцијата.
„Во Бугарија можеби има едно-две-три такви деца годишно, ако не им помогнеме зашто сакаме пари, ќе бидеме многу патетични“ – рекла Чачева.
Мајката на бебето, Јорданка, и нејзиниот сопруг Атанас им се бескрајно благодарни на докторките. Тие дури и ја крстија својата ќерка Христијана, по главната докторка во операцијата, Кристина Чачева.
Семејството Михајлови
„Имавме многу пречки, но сега сме добри. Ја чекавме 10 години. Господ беше со нас. Во Бугарија има доктори кои можат да помогнат“ – рекол благодарниот Атанас.