„Душава ми ја изгоре, срцето ми го распарчи“: Сопругата на Ристе Велков со трогателни пораки за него и синот Адам по нивната смрт

Македонската јавност беше потресена по страшната сообраќајна несреќа во која животот го загубија четири лица, меѓу кои оперскиот пејач Ристе Велков, неговиот 20-годишен син Адам и уште две 20-годишни момчиња.

Не постојат зборови со кои може да се опише празнината во срцата на нивните најблиски. Скршената сопруга на Ристе и мајка на Адам се огласи на социјалните мрежи со потресни пораки кои расплакаа стотици граѓани.

Христина Велкова се збогуваше со својата прва радост, синот Адам, признавајќи дека не знае како ќе го продолжи животот без него.

Ах, Адам мој! Прва радост моја! Душава ми ја изгоре, срцето ми го распарчи! 
Си замина без поздрав, без да те прегрнам и помирисам за последен пат. Ме научи многу работи, но не ме научи како да живеам без тебе, без твојата најубава насмевка, без твојот глас.
Збогум чедо мајкино, не си сам, со тебе се тато, Петар и Марко.
Ќе биде многу тешко без тебе.
Збогум најмил мој!

Христина се прости и од својот сопруг Ристе, опишувајќи го последното испраќање како филмска, но сурова сцена, во која и самата природа сочувствувала со нивната болка. Ужалената Христина вети дека ќе собере сила за нивната малечка ќерка Марија.

Збогум љубов моја! 
Збогум кралу мој!
Збогум мој NABUCCO! 
Денешното испраќање до твоето вечно почивалиште беше токму како сцена од „Nabucco”- силна грмотевица и гром го погоди мојот Набуко, но овој пат засекогаш.
Денеска и небото плачеше со нас за тебе и за нашиот принц Адам. Чувај го таму горе како што го чуваше овде на земјата, а јас ти ветувам дека душата ќе ја дадам за да ја пораснам и изведам на прав пат нашата малечка Марија.
ЗБОГУМ ЉУБОВ МОЈА.