Италијанскиот парламент едногласно изгласа закон со кој фемицидот, убиството на жена мотивирано од полот, станува посебно кривично дело казниво со доживотен затвор.
Гласањето симболично се одржа на 25 ноември, Меѓународниот ден за елиминација на насилството врз жените.
Овој закон доаѓа по силната реакција на јавноста предизвикана од убиството на 22-годишната Џулија Чекетин во 2023 година. Студентката со десетици убодни рани беше убиена од страна на нејзиниот поранешен партнер, а тој случај ја потресе Италија и предизвика масовни протести.
Нејзината сестра, Елена, јавно проговори дека корените на насилството врз жените ги гледа во патријархалните општествени структури и културата на силување.
Законот, предложен од премиерката Џорџа Мелони, беше поддржан и од власта и од опозицијата. Италија станува една од ретките европски земји, покрај Кипар, Малта и Хрватска, кои го дефинираат фемицидот како посебна категорија во кривичниот законик.
Со новите одредби, секое убиство на жена мотивирано од полот ќе биде регистрирано и истражувано како фемицид. Според податоците на италијанскиот статистички институт ISTAT, во 2024 година биле забележани 106 фемициди, од кои 62 биле извршени од партнер или поранешен партнер на жртвата.
