Домашна задача која вреди повеќе од трофеј: Боксерот Гого Славески трогнат од составот на детенце
Македонскиот боксер Горјан Гого Славески сподели фотографија која искрено ги трогна неговите следбеници на социјалните мрежи.
Светскиот шампион во борби без ракавици објави домашна задача од свој млад фан, во која посветеноста и животната приказна на Гого се наведени како инспирација.
Домашната задача, насловена „Мојот омилен спортист“, напишана со детски ракопис и искреност, го опишува боксерот на едноставен, но длабоко емотивен начин.
„Овие работи ми се позначајни од било каков трофеј и се мотивација, потсетник да не помислам на било каков застој во оваа кариера. Само напред царче верувам дека ќе постигнеш 10х поголем успех од мене!!“ – напиша Славески во описот на објавата, која собра бројни позитивни реакции.
Гого во објавата го претстави и детето кое стои зад ова дело, истото момче што се појавува и во видеозаписот за песната „Води ме“ од Слаткар и Калиопи. Во спотот, токму тоа дете го глуми малиот Гого, кој сонува да стане она што е денес, и покрај сите препреки на патот.
