Џамбазов и Левенска со моќен перформанс: „Еве ја таа проста земја што ги научи и ѕвездите да шепотат на македонски, а никој не ја знае“

Игор Џамбазов и Драгана Левенска синоќа ги одушевија битолчани со моќен перформанс кој допира до срцето на секој Македонец.

Познатиот македонски актер ја започна изведбата на караванот „Силно светнал ден“ со зборовите на Анте Поповски: 

„Еве ја таа проста земја
од дволичен камен
и сонце.

О, еве ја таа проста земја
од грч
и од чекање
Што ги научи и ѕвездите да шепотат на македонски
А никој не ја знае“.

Драгана продолжи со „Нашинска“ од Гане Тодоровски, па се редеа стиховите на „Тешкото“ од Блаже Конески, „Фуснота без повод“ на Гане Тодоровски и „На кинисуење“ од Коле Неделковски.

Игор беше водител и раскажувач на манифестацијата, која се одржува по повод 35-годишнината од независноста на Македонија и претставува музичко-сценско патување низ различни периоди од македонската историја, култура и уметност.

Проектот, во режија на Дејан Пројковски, ги обединува музиката, театарот и поезијата, а во него се вклучени повеќе од 30 македонски изведувачи.