25 ноември е Меѓународниот ден за борба против насилство врз жените и почеток на глобалната кампања „16 дена активизам против половото насилство“.
Целта на кампањата е зголемување на свеста и преземање на конкретни мерки за прекинување на насилството врз жените и девојчињата.
Темата оваа година е „Orange the World in 16 Days“. Секој може да се вклучи во кампањата со објавување на фотографија со пораката „Носам портокалово затоа што...“
Обединетите Нации го прогласија 25 ноември за Меѓународен ден за борба против насилство врз жените, инспирирани од бруталното убиство на сестрите Мирабал, политички активистки во Доминиканската Република во 1960 година.
Не постои земја во светот која не е засегната од овој глобален проблем. Според Светската здравствена организација, 35% од жените во светот се жртви на физичко или сексуално насилство. Во одредени земји до 70% од жените во текот на животот настрадале од сексуално или физичко насилство од страна на својот интимен партнер.
СЗО истакнува дека насилството има долгорочни последици врз психичкото и физичкото здравје на жените. Жените со насилен партнер почесто страдаат од депресија и проблеми со прекумерно консумирање алкохол и почесто се соочуваат со несакана бременост и абортус, како и сексуално преносливи инфекции меѓу кои и ХИВ.
За жал, во Македонија е зголемен бројот на брутални случаи на семејното насилство.
