Грижете се за вашето здравје, не ги прескокнувајте редовните прегледи, правете самопреглед на градите, откажете се од цигарите и алкохолот, или пак, поттикнете блиска личност да си го подобри начинот на живот.
Ајде заедно да создадеме поздрав свет без рак. Денес е Светскиот ден на ракот, кој има за цел да ја подигне свеста за оваа болест, да ги поттикне владите и поединците да преземат акција за едуцирање на луѓето, како и да ја истакне важноста на превенцијата и раната дијагностика за да се намали смртноста предизвикана од неа.
Но, на овој 4 февруари, важно е и да се сетиме на оние кои се борат со оваа болест сред пандемија и да им помогнеме на секој можен начин.
Темата оваа година е „Јас сум и Јас ќе“, а кампањата на социјалните мрежи се одвива под хаштагот #IAmAndIWill.
„Последната година од кампањата 'Јас сум и јас ќе' – ни покажува дека нашите активности имаат влијание врз сите околу нас, во нашите соседства, заедници и градови. И дека повеќе од кога било, нашите активности се чувствуваат и преку границите и океаните. Оваа година е потсетник на трајната моќ на соработка и колективно делување. Кога ќе избереме да се здружиме, можеме да го постигнеме она што сите го посакуваме: поздрав, посветол свет без рак. Заедно, сите наши активности се важни. Овој светски ден на ракот, кој си и што ќе правиш?“ – пишуваат од Институтот за јавно здравје.
Клучни факти за ракот:
- 9,6 милиони луѓе умираат од рак секоја година.
- Најмалку една третина од честите форми на рак може да се спречат.
- Ракот е втората водечка причина за смрт во светот.
- 70% од смртните случаи од рак се јавуваат во земјите со низок и среден приход.
- До 3,7 милиони животи може да се спасат секоја година со спроведување на соодветни стратегии за превенција, рано откривање и третман.
- Вкупната годишна потрошувачка за ракот се проценува на 1,16 трилиони американски долари.
Пандемијата со КОВИД-19 се одрази негативно на сите луѓе низ светот, но особено засегнати се лицата болни од рак. За нив, социјалното дистанцирање е од клучно значење, но честопати тоа е проследено со анксиозност.
Еве неколку начини на кои можете да ѝ помогнете на личност која се бори со рак за време на пандемијата:
- Преземете го пазарувањето наместо неа. Помогнете ѝ со набавката на намирници и доставувањето до нејзината врата.
- Закажете онлајн видео „средби“. Важно е да ѝ покажете дека мислите на неа, давајќи ѝ простор да ги искаже нејзините чувства.
- Редовно јавувајте ѝ се и одржувајте ги контактите, без разлика дали е преку размена на пораки или повици.
- Згответе ѝ здрав оброк и доставете ѝ го до дома. Не заборавајте многу добро да ги измиете рацете пред да ѝ доставувате храна на личност со компромитиран имунитет.
- Слушајте внимателно. Понекогаш не мора ништо да зборувате за да помогнете некому. Потребно е само да бидете слушател.
- Одете на посета преку прозорец. Споделете нешто со неа преку стакло, насмејте ја или танцувајте. Среќата не се намалува ако е споделена.
- Испратете ѝ цвеќе или друг подарок со големо значење.
Today is #WorldCancerDay and it's so important for us all to know the signs and symptoms of Cancer. pic.twitter.com/265cr5CYA4
— LifETIME-CDT (@CDTLifETIME) February 4, 2021