Цветна префинетост: Претседателката Гордана Сиљановска-Давкова на црвениот тепих на свеченото отворање на „Браќа Манаки“

Гордана Сиљановска-Давкова присуствуваше на отворањето на Интернационалниот филмски фестивал „Браќа Манаки“ во Битола.

Во улога на покровителка, македонската претседателка го прогласи фестивалот за отворен и му ја врачи престижната „Златна камера 300“ за животно дело на данскиот кинематографер Дан Лаустсен.

За свеченото отворање, Сиљановска-Давкова избра елегантен фустан со раскошен цветен принт, кој внесе свежина и боја на црвениот тепих. Креацијата во нежна светлосина нијанса е разиграна со крупни цветови во сина, розова, портокалова и зелена боја, а класичната силуета со нагласена половина и широко здолниште ѝ даде свечен и женствен изглед.

Модното издание го заокружи со светли чевли и минималистички накит, оставајќи цветниот дезен да биде главниот визуелен акцент.

На црвениот тепих беше пречекана од Димитрија Доксевски, директорот на ИФФК „Браќа Манаки“.

По отворањето, Сиљановска-Давкова сподели:

Вечерва, во својство на покровителка, го прогласив за отворено 47. издание на Интернационалниот фестивал на филмска камера „Браќа Манаки“ и ја врачив наградата „Златна камера 300“ на годинашниот лауреат, данскиот кинематографер, Дан Лаустсен. 

Споделувањето филмски искуства и водењето уметнички дијалог со светски познатите кинематографери, волшебници за и зад камерата, е недовршена книга на засега исткаени 46 приказни, чуени и видени во Битола, градот на татковците на кинематографското ткаење, првите балкански филмски сниматели, браќата Јанаки и Милтон Манаки.

Овогодишното мото на Фестивалот „Ткајачи на филм“ е исклучително силна метафора, оти филмот се ткае од светлина и сенка, од боја и движење, од звук и тишина, од вулкански емоции, оригинални идеи и моќни визии, од минатото, сегашноста и иднината, од традицијата и иновацијата, од искуството на големите мајстори и храброста на новите генерации. 

Наша должност е да го поддржиме, сочуваме и продолжиме ова драгоцено наследство, создавајќи услови новите генерации уметници слободно да творат, експериментираат, поставуваат смели прашања и храбро да ги поместуваат хоризонтите на можностите.

И покрај молскавичните промени, дигиталната поплава и модерните визуелни технологии, човекот и неговата емоција остануваат најважните ткајачи на филмските приказни, како што бабите се највештите ткајачки на килими и шехерезади.
Нека Теона, Тамара, Дина, Косара и Марија поттикнат други авторски таленти и гласови во филмската ткајачка фабрика, нека искуството и мудроста се сретнат со младоста и непослушноста, нека блесне светлата страна на Балканот, Европа и светот и нека помогне во протерувањето на темната!

Нека нишката што ја започнаа браќата Манаки продолжи да се ткае и ткае, со знаење, вештина, храброст и вечна љубов кон уметноста.