Ако сакате да наздравите со чаша алкохол, тогаш изберете во неа да има црвено вино. Се смета дека овој пијалок се бори против стареењето, го подобрува здравјето на срцето и ги намалува воспалувањата кои водат до појава на дијабетес тип 2 и мозочен удар.
Научниците веруваат дека сите овие позитивни ефекти на црвеното вино се резултат на супстанцијата ресвератрол која се наоѓа во лушпата на црното грозје.
Црвеното вино го подобрува здравјето и го продолжува животот
Истражувачи од Универзитетот Бафало во Њујорк направиле експеримент со цел да го покажат влијанието на ресвератролот врз луѓето. Тие избрале 20 учесници и на половината од нив им давале природен суплемент што содржел 40mg ресвератрол, а на другата половина – идентична таблета којашто не ја содржела оваа супстанција. Учесниците ја примале таблетата еднаш дневно во текот на 6 седмици.
Во текот на првата, третата и последната седмица бил земен примерок крв од учесниците. Анализата на крвта покажала дека ресвератролот ги потиснува молекулите кои предизвикуваат воспалувања во телото, а исто така и супстанциите во крвните садови кои влијаат врз создавањето на инсулин и со тоа го намалува ризикот од појава на дијабетес.
Кај учесниците кои не примале ресвератрол не биле забележани вакви промени.