Бура од емоции: Мајка го слуша срцето на ќерката во градите на момчето кое го прими по нејзината смрт
Една од најтрогателните приказни периодов доаѓа од Украина.
Мајка доби можност повторно да го слушне срцето на покојната ќерка во градите на момчето кое го доби по нејзината смрт.
12-годишниот Назар со години водел тешка битка за живот. По битката со леукемија, тешка пневмонија и срцева слабост, единствената надеж за негово спасување била трансплантација на срце.
Неговата шанса дошла благодарение на несебичната одлука на семејство кое, и покрај незамисливата болка од загубата на ќерката, одлучило да ги донира нејзините органи и да им подари нов живот на други лица.
По успешната трансплантација, двете семејства се сретнаа, а емотивниот момент никого не остави рамнодушен.
„Ќе ви бидам благодарна до крајот на животот. Ќе се молам за вас и за вашето дете. Ви благодарам“ – низ солзи ѝ вели мајката на Назар на жената чија најтешка животна одлука му овозможила нов почеток на нејзиниот син.
Приказната потсетува на огромното значење на донирањето органи, чин кој, дури и во најголемата трагедија, може да донесе надеж и да спаси нечиј живот.
