„Буквално се судривме и ѝ реков 'Чао бела', се сликаше само со нас“: Македонскиот фотограф Badstef за средбата со Моника Белучи

Стефан Соколовски во моментов е во Италија, каде присуствува на Модната недела во Милано.

Македонскиот фотограф, познат како Badstef, таму имаше можност да се сретне со холивудската ѕвезда Моника Белучи и да направи заедничка селфи фотографија со неа.

„Бев на ревија на Fendi, со другарка ми Жуана од ‘Дубаи Блинг’ и малку доцневме, па шоферот што директно ни го пратија од Fendi, не можеше да паркира и за малку ќе ја затвореа ревијата... влетавме во последен момент. Многу беше темно на самата локација бидејќи тука беше ревијата, осветлувањето беше направено така многу чудно, не се гледаше ништо. 

И буквално да поминам, се судрив со неа, но со грб, не видов дека е таа, а беше со темна коса и со наочари и кога рече ‘Scusi’ (Извинете) и кога се сврти, тогаш сфатив дека е таа... во шок бев и ѝ викам ‘Ciao, Bella’. И после на крајот кога излезе, се видовме, се сликавме, само со нас се сликаше... така што беше навистина момент како на филм... 

Преубава е, прекрасна е и многу е културна“ - откри Badstef, ексклузивно за Фемина.

Покрај тоа што беше гостин на ревијата, Стеф е и професионално ангажиран на неколку модни едиторијали во склоп на настаните од модната недела.

Кумановецот се дружеше и со популарниот тиктокер Џејкоб Рот и со врвниот моден фотограф Џампаоло Сгура, на забавата по повод 40-годишнината на модниот бренд „Hogan“.

Талентираниот фотограф претходно, во интервју за Фемина, рече дека имал безброј вакви ‘штипни ме – дали сонувам?’ ситуации, а зборуваше и дека патувањето на луксузни дестинации е неговото ново „нормално“ сега:

„Секако дека станува некој начин на нормала, што понекогаш знае да биде претешко и едноставно самиот тој стандард го бараш понатака низ целиот тек на животот и во сите сфери на самото живеење, и во твојата блиска средина, и во твоите пријателства, секојдневие и сѐ останато. Како човек ме менува само тоа што знаеш да вреднуваш, да препознаеш и да очекуваш квалитет околу себе. Самиот раст и успех си носи своја цена кој не секој може да ја приушти.“

Даница Караташова Илиоска /  Femina.mk