Бруклин Бекам ја преправи тетоважата посветена на татко му Дејвид откако јавно сподели дека не сака помирување со родителите

Бруклин Бекам уште повеќе го продлабочи семејниот раздор, откако беше забележано дека ја преправил тетоважата посветена на неговиот татко Дејвид. 

Наместо јасно видливиот натпис „DAD“ на големата тетоважа со сидро на неговата надлактица, сега се гледаат само три нејасни симболи, кои според странските медиуми се резултат на ласерски третман.

Извор близок до Бруклин тврди дека тој свесно одлучил да го отстрани натписот.

„Имаше толку многу болка и разочарување за него, што не би било искрено да задржи ваква посвета на телото“ – изјавил изворот.

Промената на тетоважата беше забележана кога 26-годишниот готвач беше фотографиран во Лос Анџелес со сопругата Никола Пелц. Иако зборовите „Love you Bust“, прекарот кој Дејвид му го дал уште во детството, се сè уште присутни, тие се значително избледени.

Само неколку недели претходно, Бруклин јавно изјави дека нема желба за помирување со родителите, обвинувајќи ги за намерно објавување негативни приказни за него и за неговиот брак.

Дејвид исто така има тетоважа на вратот, на која пишува „Buster“, направена во 2015 година во чест на најстариот син. 

Извори блиски до семејството велат дека ваквите постапки на Бруклин се исклучително болни за Дејвид и Викторија, но дека тие и понатаму не сакаат јавно да коментираат.